Міраслаў Адамчык

***
Сабраўся касіць
траву, але разуўся
і стаў басанож.




Айва ў двары.

Кот ловіць пчалу –
трэ пысу і мяўкае,
плачацца з гора.




***
Хатні кот у двары ловіць усё, што рухаецца і лётае, не адрознівае матылька ад пчалы і чмяля. Пчолы добра джаляць, апухла лапа і пыса, але кот усё адно ўпарта кідаецца на ўсё, што ляціць. Думаў, пчолы навучаць ката баяцца. Не, кот — упарты, пасядзіць, акрыяе і зноў кідаецца на пчолаў. Стала шкода коціка, занёс у дом, чую зноў плача, — на шыбе злавіў і прыдушыў пчалу.

***
Апошнім часам пераглядаючы здымкі, усё часцей выбіраю не самыя ўдалыя па фокусу ці рэзкасці і супакойваю сябе словамі знакамітага фатографа Карце Брэсона: “ Размовы пра рэзкасць – буржуазныя забабоны” і словамі Раберта Капа – “ Калі здымак занадта рэзкі, значыць вы былі далёка ад падзеі! “. “Рука фатографа мусіць злёгку дрыжаць і фокус збівацца”…




Віка ня ў фокусе.

Пасля здымкаў дзяўчат, так прыемна вярнуцца да просценькага нацюрморта з кветкамі.

Парк мінскай 3-й клінічнай бальніцы. Дрэвы, як падстрыжаныя хірургамі…




Учора ў бальнічным дворыку здымаў брата.

Аднакурснікі — мінчанін Артур і Насця з Гомеля.

Шмат здымаю і не паспяваю як след разабраць, праглядзець, давесці, выбраць лепшае і апрацаваць, а складаю на вінт кампутара, у спадзяванні некалі вярнуцца і пераглядзець адасобленым позіркам. Як быццам спадзяюся пазней ўбачыць нешта іншае, знятае не мною.

Мінчанка Насця.

Віка з Лунінца.

Увечары з Таццянаю заходзілі да брата ў бальніцу, занеслі кубак і лыжку. Аказваецца ў нашы бальніцы трэба абавязкова класціся са сваімі лыжкамі і кубкамі. Здаецца, выключна нашая традыцыя! Лыжак беларускія бальніцы, як не мелі, так не маюць.
Валодзя смеючыся расказаў, што яму не далі за абедам катлету: “ Вы да нас толькі леглі – на вас катлету яшчэ ня выпісалі! Пакормім, чым зможам!” Далі пусты рыс з чорным хлебам і вараны бурак.
Таня спытала, ці адчувае ён сябе выключаным з жыцця.
–Не, — абурыўся брат, — Я ўжо два інтэрв’ю нагаварыў па тэлефону з прыбіральні!
Брат быў вясёлы, так што, спадзяюся, хутка паправіцца.